Палатаи савдо ва саноати вилояти Суғд Ҷумҳурии Тоҷикистон

Дар шаҳри Хуҷанд мулоқоти соҳибкорони вилоят бо ҳамкорони онҳо аз Ҷумҳурии Қирғизистон баргузор гардид. Мавзӯи меҳварии муколамаро тақвияти ҳамкориҳои саноатӣ ташкил дод, ки дар он ба рушди бахши нассоҷӣ таваҷҷуҳи хосса зоҳир карда шуд.

Чорабиниро муовини Раиси вилояти Суғд Анвар Яъқубӣ оғоз намуда, иштирокчиёнро хайрамақдам гуфт.  Зимни  суханронӣ таъкид дошт, ки роҳбарияти вилоят ба густариши муносибатҳои тиҷоративу иқтисодӣ бо кишварҳои ҳамсоя аҳамияти аввалиндараҷа медиҳад.

Минтақаҳои мо дорои иқтидори бузурги истифоданашуда мебошанд. Мо бояд аз тиҷорати оддӣ ба марҳалаи эҷоди занҷираҳои муштараки истеҳсолӣ гузарем. Вилояти Суғд омода аст, ки ба шарикони қирғизистонӣ на танҳо ашёи хом, балки майдонҳои мусоиди сармоягузориро бо инфрасохтори муосир пешниҳод намояд, иброз дошт Анвар Яъқубӣ.

Раиси Ассотсиатсияи саноати сабуки Қирғизистон Дилорамкан Дуйшобаева зимни баромади худ ба имкониятҳои мутақобилаи ҳарду ҷониб таваҷҷуҳ намуда, чунин қайд кард:

Мо набояд якдигарро ҳамчун рақиб шуморем. Баръакс, имкониятҳои мо якдигарро комилан пурра мекунанд. Вилояти Суғд дорои заминаи бойи ашёи хом, ришта ва матоъҳои босифат мебошад. Қирғизистон бошад, дар моделсозӣ, тарроҳӣ ва пешбурди либосҳои омода дар маркетплейсҳои байналмилалӣ таҷрибаи ғанӣ дорад. Бо муттаҳид кардани ин захираҳо, мо метавонем бренди пуриқтидорро эҷод кунем».

Қисмати самарабахши форум баргузории мулоқотҳои мустақими доираҳои соҳибкорӣ дар формати B2B гардид. Соҳибкорон имкон пайдо карданд, ки бо шарикони эҳтимолӣ музокироти рӯ ба рӯ анҷом дода, масъалаҳои воридоту содиротро баррасӣ намоянд.

Дар анҷоми мулоқот таваҷҷуҳи зиёди иштирокчиён ба роҳандозии робитаҳои дарозмуддати шарикӣ мушоҳида гардид. Намояндагони бахши хусусӣ омодагии худро барои омӯзиши бозорҳои ҳамдигар, таъсиси корхонаҳои муштарак ва татбиқи лоиҳаҳои кооператсионӣ дар соҳаҳои мухталиф изҳор доштанд.

Қисмати амалии чорабинӣ боздиди меҳмонон аз корхонаҳои бузурги нассоҷии вилоят, аз ҷумла ҶДММ КМ «Ҷавонӣ», ҶДММ «САТН», ҶДММ «Лидер» ва дигар корхонаҳо буд. Ҳайати меҳмонон ва коршиносон сатҳи технологии саноати вилояти Суғдро баланд арзёбӣ намуда, ҷиҳати ҳамкориҳои оянда заминаи мусоид дарёфт карданд.

• Prev
• Next